(၁၉)ကြိမ်မြောက်မြန်မာ-တရုတ်(အွန်လိုင်း)နယ်စပ်ကုန်သွယ်ရေး ကုန်စည်ပြပွဲကျင်းပပြုလုပ်မည်

 

            ပြည်ထောင်စုသမ္မတမြန်မာနိုင်ငံတော်အစိုးရနှင့် တရုတ်ပြည်သူ့သမ္မတနိုင်ငံအစိုးရတို့အကြားချုပ်ဆို ခဲ့သည့် မြန်မာ-တရုတ်နယ်စပ်ဒေသများ  စီမံခန့်ခွဲရေးနှင့်ပူးပေါင်း ဆောင်ရွက်ရေးဆိုင်ရာသဘောတူညီမှု စာချုပ် ၁၉၉၇အရ နယ်စပ်ကုန်စည်ပြပွဲနှင့် နှစ်နိုင်ငံနယ်စပ်ကုန်သွယ်မှုပူးပေါင်း ညှိနှိုင်းရေးကော်မတီ ဆွေးနွေးပွဲကို ၂၀၀၁ခုနှစ်မှစ၍ အလှည့်ကျကျင်းပလျက်ရှိပါသည်။ မြန်မာ-တရုတ်နယ်စပ်ကုန်သွယ်ရေး ကုန်စည်ပြပွဲကို မြန်မာနိုင်ငံ၊ မူဆယ်မြို့နှင့်တရုတ်နိုင်ငံ၊ ရွှေလီမြို့တို့တွင် စီးပွားရေးနှင့်ကူးသန်းရောင်းဝယ်ရေး ဝန်ကြီးဌာန၊ မြန်မာကုန်သွယ်မှုမြှင့်တင်ရေးအဖွဲ့နှင့် တရုတ်နိုင်ငံ၊ တယ်ဟုန်ကိုယ်ပိုင်အုပ်ချုပ်ခွင့်ရ ပြည်နယ်ခွဲ တို့က ဦးစီး၍နှစ်စဉ်အလှည့်ကျ ကျင်းပပြုလုပ်ခဲ့ရာ (၁၈)ကြိမ်မြောက်နယ်စပ်ကုန်စည်ပြပွဲကို အောင်မြင်စွာ ကျင်းပပြုလုပ်နိုင်ခဲ့ပြီး ဖြစ်ပါသည်။

           ယခုနှစ် (၁၉)ကြိမ်မြောက်မြန်မာ-တရုတ်နယ်စပ်ကုန်စည်ပြပွဲကို မြန်မာနိုင်ငံမှဦးဆောင်၍ မူဆယ်မြို့ တွင်လက်ခံကျင်းပရမည်ဖြစ်ပါသည်။ သို့ရာတွင်မြန်မာနိုင်ငံတွင် ရင်ဆိုင်နေရသောCovid-19 ကပ်ရောဂါ ကြောင့် မူဆယ်မြို့တွင်လက်ခံကျင်းပရန် မဖြစ်နိုင်သောကြောင့် မြန်မာကုန်သွယ်မှုမြှင့်တင်ရေးအဖွဲ့မှ Myanmar Online Expo Park Platform တွင် Online Trade Fair  အဖြစ် ကျင်းပပြုလုပ်ရန် စီစဉ်ဆောင်ရွက်သွားမည် ဖြစ်ပါသည်။

 

              (၁၉)ကြိမ်မြောက် မြန်မာ-တရုတ်ကုန်သွယ်ရေး နယ်စပ်ကုန်စည်ပြပွဲကို ၂၀၂၀ပြည့်နှစ်၊ ဒီဇင် ဘာလ (၁၄)ရက်နေ့မှ(၁၆)ရက်နေ့အထိ(၃)ရက်ကြာ ကျင်းပပြုလုပ်မည်ဖြစ်ပြီး ပြပွဲကာလအတွင်း (၁၅)ကြိမ်မြောက် မြန်မာ-တရုတ်နယ်စပ်ကုန်သွယ်မှု ပူးပေါင်းညှိနှိုင်းရေးကော်မတီဆွေးနွေးပွဲ(JBTCCC)ကိုလည်း ထည့်သွင်း ကျင်းပ သွားမည်ဖြစ်ပါသည်။ သို့ပါ၍စိတ်ပါဝင်စားသည့် လုပ်ငန်းရှင်များအနေဖြင့် မြန်မာအပြည်ပြည်ဆိုင်ရာ ကုန်သွယ်မှုဗဟိုဌာန ဖုန်း၀၁-၃၇၇၁၀၁၊ ၀၁-၃၈၅၃၂၃၊ Email:mitcmyantrade@gmail.comနှင့် Myanmar Online Expo Park ဖုန်း ၀၉-၅၀၂၃၁၈၂၊ Email:myanmarexpopark@gmail.com တို့သို့ ဆက်သွယ် ပါဝင်နိုင်ပါကြောင်း သတင်းရရှိပါသည်။

MITC News