အိန္ဒိယနိုင်ငံ၏ ၂၀၂၀-၂၀၂၁ ဘဏ္ဍာနှစ်အတွက် မတ်ပဲတင်သွင်းခွင့် ခွဲတမ်း သတ်မှတ်ချက် ထုတ်ပြန်ခြင်း ~ Myanmar International Trade Center

အိန္ဒိယနိုင်ငံ၏ ၂၀၂၀-၂၀၂၁ ဘဏ္ဍာနှစ်အတွက် မတ်ပဲတင်သွင်းခွင့် ခွဲတမ်း သတ်မှတ်ချက် ထုတ်ပြန်ခြင်း

၂၀၁၅-၂၀၂၀ နိုင်ငံခြားကုန်သွယ်မှုမူဝါဒအရ ဗဟိုအစိုးရက ၂၀၁၇ ခုနှစ်မှစတင်၍ ကန့်သတ်တင်သွင်း ကုန်စည်အဖြစ် သတ်မှတ်ထားသည့် မတ်ပဲအား ၂၀၂၀-၂၀၂၁ ဘဏ္ဍာနှစ်အတွက် တန်ချိန် ၄ သိန်း သတ်မှတ်၍ တင်သွင်းခွင့်ပြုမည်ဖြစ်ကြောင်း၊ ယခုကန့်သတ်ချက်သည် အိန္ဒိယအစိုးရ၏ နှစ်နိုင်ငံချင်း သို့မဟုတ် ဒေသဆိုင်ရာအဆင့် လက်မှတ်ရေးထိုးထားသည့် နားလည်မှုစာချွန်လွှာများနှင့် သက်ဆိုင်မှု မရှိကြောင်း၊ ၃.၃.၂၀၂၀ နေ့၌ ပြည်ပကုန်သွယ်ရေး ညွှန်ကြားမှု ဦးစီးဌာန(DGFT)မှ ကုန်သွယ်ရေး အသိပေးချက် အမှတ် ၅၄/၂၀၁၉-၂၀ ဖြင့် ၂၀၁၉-၂၀ ဘဏ္ဍာနှစ် အတွက် ၃၀.၄.၂၀၂၀ နေ့အထိ အချိန်တိုးမြှင့်

တင်သွင်းခွင့်ပြုထားသည့် မတ်ပဲတန်ချိန် ၂ သိန်း ၅ သောင်းအား သီးခြားဆက်လက် တင်သွင်းရန် ဖြစ်ကြောင်းနှင့် ၂၀၂၀-၂၀၂၁ ဘဏ္ဍာနှစ်အတွက် ပြည်တွင်းရှိ ပဲခွဲစက်နှင့် ပဲသန့်စင်မှုလုပ်ငန်း ဆောင်ရွက်သူ များကသာ DGFT ဌာနမှ သတ်မှတ် သည့် လုပ်ထုံးလုပ်နည်းများနှင့်အညီ မတ်ပဲတင်သွင်းခွင့်ခွဲတမ်း လျှောက်ထားနိုင်ကြောင်း ဖော်ပြ ပါရှိသည့် အမိန့်ကြော်ငြာစာအား အိန္ဒိယ ကူးသန်းရောင်းဝယ်ရေးနှင့် စက်မှုဝန်ကြီးဌာနရှိ ကူးသန်းရောင်းဝယ်ရေးဌာနက ၁၇.၃.၂၀၂၀ နေ့ တွင် ထုတ်ပြန်ခဲ့ပါသည်။

ထို့နောက် ပြည်ပကုန်သွယ်ရေး ညွှန်ကြားမှုဦးစီးဌာန(DGFT)သည် ၁၉.၃.၂၀၂၀ နေ့တွင် ကုန်သွယ်ရေး အသိပေးချက်အမှတ် ၅၆/၂၀၁၉-၂၀ နှင့် ၅၇/၂၀၁၉-၂၀ တို့ကို ထပ်ဆင့်ထုတ်ပြန်ခဲ့ရာ ၂၀၂၀-၂၀၂၁ ဘဏ္ဍာနှစ်အတွက် တင်သွင်းခွင့်ပြုသည့် အဆိုပါ မတ်ပဲ တန်ချိန် ၄ သိန်းသည် ၁.၅.၂၀၂၀ နေ့မှ ၃၁.၃.၂၀၂၁ ရက်နေ့အတွင်းသာ တင်သွင်းရန် အကျုံးဝင်ကြောင်း၊ ပြည်တွင်းရှိ ပဲခွဲစက်နှင့် ပဲသန့်စင်မှုလုပ်ငန်း လုပ်ကိုင်သူများ အနေဖြင့် ၂၀၂၀ ပြည့်နှစ် မတ်လ ၂၀ ရက်မှ ၃၁ ရက်နေ့အတွင်း DGFT ၏ အင်တာနက် စာမျက်နှာမှတစ်ဆင့် ကိုတာလျောက်လွှာများ တင်သွင်းနိုင်ကြောင်း၊ မတ်ပဲတင်သွင်းခွင့်ရရှိသည့် ကုမ္ပဏီများသည် အိန္ဒိယနိုင်ငံရှိဆိပ်ကမ်းသို့ ၃၁.၃.၂၀၂၁ နေ့ အရောက် တင်သွင်းရမည်ဖြစ်ပြီး ၎င်းမတ်ပဲများ တင်သွင်းရန် အချိန်တိုးမြှင့်တောင်းခံခြင်းကို လက်ခံဆောင်ရွက်မည် မဟုတ်ကြောင်း သိရှိရပါသည်။

နေအေးလွင်

စီးပွားရေးသံမှူး

မြန်မာသံရုံး၊ နယူးဒေလီမြို့