အိန္ဒိယနိုင်ငံမှ မြန်မာ့မတ်ပဲတန်ချိန် ၂.၅ သိန်းအားတိုးမြှင့်တင်သွင်းခွင့် ပြု

     အိန္ဒိယနိုင်ငံသည် မြန်မာနိုင်ငံမှ ၂၀၁၉-၂၀၂၀ဘဏ္ဍာနှစ်အတွင်း မတ်ပဲတင်သွင်းခွင့်ကိုတာ သတ်မှတ်ချက်ကို မူလကတန်ချိန်၁.၅သိန်းသတ်မှတ်ထားရာမှ နောက်ထပ်တန်ချိန် ၂.၅ သိန်းတိုးမြှင့်တင်သွင်းခွင့် ပြုမည်ဖြစ်ကြောင်းအိန္ဒိယကူးသန်းရောင်းဝယ်ရေးနှင့် စက်မှုဝန်ကြီးဌာန၊ ပြည်ပကုန်သွယ်မှု ညွှန်ကြားရေး ဦးစီးဌာန(DGFT)က ၁၉.၁၂.၂၀၁၉ နေ့တွင် Trade Notice No.43/2019-2020ဖြင့် ကုန်သွယ်ရေး အသိပေးချက် ထုတ်ပြန်လိုက်ပါသည်။

       အိန္ဒိယနိုင်ငံ၏ ၂၀၁၅-၂၀၂၀ နိုင်ငံခြားကုန်သွယ်မှုမူဝါဒအရဗဟိုအစိုးရက ၂၀၁၇ ခုနှစ် မှစတင်၍ ကန့်သတ်တင်သွင်းကုန်စည်အဖြစ် သတ်မှတ်ထားသည့် မတ်ပဲအားပြည်ပကုန်သွယ်မှု ညွှန်ကြားရေး ဦးစီးဌာနကသတ်မှတ်သည့် ဘဏ္ဍာရေးနှစ်အတွင်းကိုတာတန်ချိန် ၄ သိန်းအထိ ကန့်သတ်တင်သွင်းခွင့် ပြုလိုက်ကြောင်း၊ ယခုကန့်သတ်ချက်သည် အိန္ဒိယအစိုးရကနှစ်နိုင်ငံချင်းသို့မဟုတ် ဒေသဆိုင်ရာအဆင့် လက်မှတ်ရေးထိုးထားရှိသည့် နားလည်မှုစာချွန်လွှာ(MoU)များနှင့် သက်ဆိုင်ခြင်းမရှိကြောင်းဖေါ်ပြ ထားသည့်အမိန့်ကြော်ငြာစာကို ၁၈.၁၂.၂၀၁၉နေ့တွင် အိန္ဒိယကူးသန်းရောင်းဝယ်ရေးနှင့် စက်မှုဝန်ကြီးဌာန ကထုတ်ပြန်ခဲ့သည်။

   DGFTဌာနသည် အဆိုပါအမိန့်ကြော်ငြာစာအရကုန်သွယ်မှုအသိပေးချက်ကိုထပ်ဆင့် ထုတ်ပြန်ခဲ့ခြင်း ဖြစ်ပြီးတိုးမြှင့်တင်သွင်းခွင့်ပြုမည့် မတ်ပဲတန်ချိန် ၂.၅ သိန်းအားပြည်တွင်းရှိပဲခွဲစက်နှင့် ပဲသန့်စင်မှုလုပ်ငန်း လုပ်ကိုင်သူများသို့ တင်သွင်းခွင့်ကိုတာများခွဲဝေချထားပေးမည် ဖြစ်ကြောင်း၊ သွင်းကုန်လုပ်ငန်းရှင်များ အနေဖြင့် ၂၀၁၉ခုနှစ် ဒီဇင်ဘာလ(၂၀)ရက်မှ(၃၁)ရက်နေ့အတွင်း အင်တာနက်အွန်လိုင်းမှကိုတာ လျောက်လွှာများ တင်သွင်းနိုင်ကြောင်း၊ ထပ်တိုးမတ်ပဲကိုတာတန်ချိန် ၂.၅ သိန်းအားတင်သွင်းခွင့်ရရှိသည့် ကုမ္ပဏီများသည် ၃၁.၃.၂၀၂၀နေ့ အိန္ဒိယနိုင်ငံဆိပ်ကမ်းသို့အရောက် တင်သွင်းရမည်ဖြစ်ကြောင်းသတင်း ရရှိပါသည်။

Source: Trade Notice No.43/2019-2020, Directorate General of Foreign Trade, Ministry of Commerce and Industry of India